მილიარდერი ჯეფ ბეზოსი და მისი საყვარელი ქალი, ლორენ სანჩესი გრანდიოზული ქორწილისთვის ემზადებიან. ტაბლოიდები ელოდებიან, რომ ეს იქნება დაახლოებით ისეთი მასშტაბის ღონისძიება, როგორიც პრინცესა დაიანას ქორწილი იყო. მოსალოდნელ ღონისძიებას კი მედიაში უკვე უწოდეს საუკუნის ქორწილი.
-
ლორენ სანჩესის ძმა პოლი ამბობს, რომ ეს იქნება დიდი და ძალიან მხიარული წვეულება, საოცარი მოვლენა. თავდაპირველად ლედი დის ქორწილს, მოსალოდნელი წვეულება სწორედ ლორენის ძმამ შეადარა და შემდეგ მისი ფრაზა მედიაშიც აიტაცეს.
პოლის თქმით, წყვილი ქორწილის სტუმრებს სთხოვს, საჩუქრების ნაცვლად, გააკეთონ შეწირულება საქველმოქმედო ორგანიზაციისთვის.
- ცნობილი ხდება, რომ წყვილი ქორწილს ამ ზაფხულს, იტალიაში, ვენეციაში გადაიხდის და მას მეგა ვარსკვლავები დაესწრებიან. აღსანიშნავია, რომ ამ ამბავმა ტურისტების აღშფოთება გამოიწვია, რადგან მიიჩნევენ, რომ მილიარდერების ქორწილი მათ ტურისტულ მიზნებს ვენეციაში ხელს შეუშლის, თუმცა ვენეციის მერმა, ლუიჯი ბრუნარომ განაცხადა, რომ ტურისტებს ბეზოსის ქორწილი ვერ შეაფერხებს.
მან უარყო ინფორმაცია იმის შესახებ, რომ თითქოს წყვილმა დაჯავშნა მრავალი სასტუმრო, გონდოლები და წყლის ტაქსები მომავალი ქორწილისთვის.
“ჩვენ ვმუშაობთ და მხარს ვუჭერთ ქორწილის ორგანიზატორებს. ისინიც სრულ პატივისცემას იჩენენ ჩვენი ქალაქის, აქაური კულტურისა და უნიკალურობის მიმართ”, – ამბობს ვენეციის მერი.
ჯერჯერობით უცნობია ზუსტი თარიღი – როდის გაიმართება ქორწილი, თუმცა PageSix-მა გაარკვია, რომ ვენეციის საუკეთესო სასტუმროები Gritti Palace და Aman Venice სრულად დაჯავშნილია 26-დან 29 ივნისის ჩათვლით. ამიტომ, ვარაუდობენ, რომ გრანდიოზულ წვეულებას სწორედ ამ პერიოდში ელოდებიან.
გარდა ამისა, როგორც გამოცემა წერს წყვილის ქორწილის მისაწვევები გაეგზავნათ ისეთ ვარსკვლავებს, როგორებიც არიან კიმ კარდაშიანი, ოპრა უინფრი, ივანკა ტრამპი, ლეონარდო დიკაპრიო, ევა ლონგორია და სხვები.
