უკვე რამდენიმე კვირაა “უცხოური გავლენის გამჭვირვალობის“ შესახებ კანონპროექტი განხილვის მწვავე თემაა. არ წყდება ქუჩის პროტესტი. ახალგაზრდები ყოველდღიურად იკრიბებიან და მსვლელობით მიემართებიან პარლამენტისკენ.
მსახიობი ნატალია ყიფშიძე ერთ-ერთია მათ შორის, ვისთვისაც აღნიშნული კანონპროექტი მიუღებელია. ნატალიას პოზიციას სოციალურ ქსელში კომენტარის სახით გამოეხმაურა მისი ბაბუა, მსახიობი ზურა ყიფშიძე და დაწერა: “ვაი, მე! სადა ბანაობ, შვილო! შე ვირიშვილო, ვინ კამათობს იმაზე, რასაც ამბობ? ცოტა გაერკვიეთ! გაახილეთ თვალები და დაცქვიტეთ ყურუშკები! შენ, ჩვენი თაობის მუსიკის მოყვარული, საოცარია, ასე ვინ დაგაბოლა? ნაღვლიანად ვარ! სამწუხაროა“.
მალევე ნატალიამ ბაბუას ასე უპასუხა: “მეც ნაღვლიანად ვარ, ბა. მოგეწერა ან დაგერეკა, ასე თუ შეგტკივა გული. მეც არ გეთანხმები, მაგრამ არ მოგმართავ, განსაკუთრებით სახალხოდ. სამწუხაროა, ნამდვილად“.
ამ სისულელეებს რომ ავყვეთ, ვერ გავჩერდებით, მე რომ ჩემს შვილიშვილს კომენტარი დავუწერე ნახევრად იუმორით, ისეთი ლანძღვა-გინება მივიღე, სასაცილოც კია. სირცხვილია, რა ამბავიც ააგორეს. ნატალიკო ჩემი ახალგაზრდობის მუსიკას უსმენს, “ბითლზის” ჩემი საყვარელი ბოლო ოთხი ფოტო სწორედ მას ვაჩუქე. არაჩვეულებრივი ურთიერთობა რომ გვაქვს, იმიტომაც მივმართე ასე იუმორით! რა ვიცოდი, თუ ასეთ აჟიოტაჟს გამოიწვევდა, თორემ სულ არ დავწერდი არაფერს, ისე ვეტყოდი, ყურში…
მწყინს, რომ ახალგაზრდები შეცდომაში შეიყვანეს, ბოლომდე ვერ გაიგეს, რა და როგორ არის, იყენებენ მათ და ესაა საწყენი. ეს ბავშვები უჭკუოები და გაუნათლებლები რომ იყვნენ, ხმას არ ამოვიღებდი, მაგრამ ასე არაა, პირიქით, აზროვნებენ, თავიანთი შეხედულებები, გემოვნება აქვთ და უცბად… რა არის ეს?!
– თქვენთვის მიუღებელია, რომ იმ აქციაზე დგანან?
– რასაკვირველია. ჯერ ერთი, უნდა გაერკვე ადამიანი, რა კანონია და რა ხდება. რაც არ ვიცი, მე იმაში ცხვირს არ ვყოფ.
ჩემი შვილიშვილები ჩემს ხელში გაიზარდნენ, ნიკუშა 23 წლისაა და ახლაც ჩემთანაა, ნატალია გადავიდა, თორემ ხშირად მოდის, თავის პატარა და-ძმას ეფერება, უვლის. მწყინს, რომ ალექსანდრე, ჩემი შუათანა შვილიშვილი, ცოტა დაგვეკარგა. გენიოსი ბიჭია. მე და ნატალიას აბსოლუტურად ნორმალური ურთიერთობა გვაქვს, როგორიც ბაბუასა და შვილიშვილს უნდა ჰქონდეს.